
那洛巴大师教言集NARO21ཡི་དམ་དགྱེས་པ་རྡོ་རྗེའི་ཤོག་རིལ།
1-4-12a

༄༅། །ཡི་དམ་དགྱེས་པ་རྡོ་རྗེའི་ཤོག་རིལ།
༄༅། །ཡི་དམ་དགྱེས་པ་རྡོ་རྗེའི་ཤོག་རིལ་བཞུགས་སོ། །རྒྱ་གར་སྐད་དུ། ཤྲི་ཧེ་བཛྲ་བྷུ་ཛ་ས་ཏ་ན་མ། བོད་སྐད་དུ། དཔལ་
དགྱེས་པ་རྡོ་རྗེ་ཕྱག་གཉིས་པའི་བསྒྲུབ་(སྒྲུབ་)ཐབས་ཞེས་བྱ་བ། དཔལ་རྡོ་རྗེ་ཧཱུཾ་མཛད་ལ་ཕྱག་འཚལ་ལོ། །འཇིག་རྟེན་གསུམ་ན་ཁྱབ་མཛད་པ། །ཤེས་རབ་ཐབས་ཀྱི་ཁ་སྦྱར་གནས། །འཇིག་རྟེན་ཀུན་
ལ་བདེ་སྟེར་བའི། །དཔའ་བོ་ཧེ་རུ་ཀ་ལ་འདུད། །དེས་བསྡུས་པས་ཏེ་རྒྱས་པར་མིན། །སྐལ་ལྡན་སེམས་ཅན་དོན་དུ་ནི། །བསྒྲུབ་པའི་ཐབས་ནི་བཤད་པར་བྱ། །ནང་པར་མལ་ནས་ལངས་ནས་
ནི། །གདོང་ལ་སོགས་པ་དག་པར་བྱ། །དུར་ཁྲོད་དག་གམ་ཆུ་བོའི་ངོགས། །ཤིན་དུ་(ཏུ་)དབེན་པའི་ས་ཕྱོགས་སུ། །ཧེ་རུ་ཀ་དཔལ་ཐུགས་རྗེའི་བདག །རྣལ་འབྱོར་དཔའ་བོ་བསྒྲུབ་པར་བྱ། །སྤྱི་བོ་
ནས་ནི་རྐང་པའི་བར། །དབྱངས་ཡིག་བཅུ་དྲུག་དགོད་པར་བྱ། །དེ་ཡིས་རང་གིས་ལུས་པོ་ནི། །སྟོན་ཁའི་ཟླ་བ་ལྟ་བུར་བསམ། །སྙིང་ཁར་པཾ་ལས་པདྨའི་སྟེང་། །རཾ་ལས་ཉི་མའི་དཀྱིལ་
འཁོར་བསམ། །དེའི་འོད་ཟེར་མེ་ལྟ་བུས། །བགེགས་ཀྱི་ཚོགས་རྣམས་བསྲེགས་པར་བསམ། །དེ་ནས་བགེགས་མེད་བདག་ཉིད་ནི། །མདུན་དུ་བླ་མ་འདོད་ལྷ་དང་། །སངས་རྒྱས་ལྷ་མོའི་
1-4-12b

ཚོགས་རྣམས་ལ། །ཡིད་ཀྱིས་རབ་ཏུ་མཆོད་པར་བསམ། །དེ་ནས་སྙིང་གའི་ཡི་གེ་ཧཱུཾ། །བསམས་ཏེ་འོད་ཟེར་རྣམས་འཕྲོས་ནས། །བྱམས་དང་སྙིང་རྗེ་དགའ་བ་དང་། །བཏང་སྙོམས་ཡང་ནི་
བསྒོམ་པར་བྱ། །དེ་རྗེས་ཆོས་རྣམས་ཐམས་ཅད་ནི། །རང་བཞིན་མེད་པར་ཤེས་པར་བྱ། །སྐད་ཅིག་སྟོང་པ་ཉིད་གནས་ཏེ། །བདག་ཉིད་ཡེ་ཤེས་ལྔ་དག་བསམ། །ཨོཾ་ཤཱུ་ནྱ་ཏ་ཛྙ་ན་བཛྲ་ས་བྷ་ཝ་
ཨད་མ་ཀོ་ཧཾ། སྔགས་འདིས་ཡེ་ཤེས་ལྔ་དངོས་སུ། །ཧཱུཾ་གི་བདག་ཉིད་ཤེས་པར་བྱ། །འོད་ཟེར་རྣམ་ལྔ་ཀུན་དུ་(ཏུ་)འཁྲུད། །དེ་ཡིས་སེམས་ཅན་མ་ལུས་པ། །སྦྱངས་ཏེ་སྙིང་ཁར་ཐིམ་པར་
བྱས། །ཐིག་ལེ་ཞུ་བ་དེ་ལས་ནི། །པདྨ་ཉི་མའི་གདན་སྟེང་དུ། །བདག་ཉིད་ཧེ་རུ་ཀ་དཔལ་གྱུར། །ཞལ་གཅིག་པ་ལ་ཕྱག་གཉིས་པ། །སྐུ་མདོག་ནག་པོ་ཤིན་ཏུ་འཇིགས། །ཕྱག་ན་རྡོ་རྗེ་
དྲིལ་བུ་བསྣམས། །རྡོ་རྗེ་ཕག་མོས་མགུལ་ནས་མཁྱུད། །ལྷ་མོ་ཞལ་གཅིག་ཕྱག་གཉིས་མ། །གཡོན་ན་ཐོད་པ་ཁ་ཊཾ་འཛིན། །དེ་བཞིན་གཡས་ན་གྲི་གུག་འཛིན། །ཅུང་ཟད་མཆེ་བ་
གཙིགས་པ་སྟེ། །བདག་པོའི་ཞལ་ནི་མངོན་པར་མཛད། །གཡས་བརྐྱང་པའི་བཞུགས་བསོ། །པདྨ་ཉི་མའི་སྟེང་ན་བཞུགས། །ཕྱག་རྒྱ་ལྔ་དང་བཅས་པའི་ལྷ། །སྣ་ཚོགས་རྡོ་རྗེ་དབུ་ལ་
1-4-13a

བརྒྱན། །དབུ་བརྒྱན་ཐོད་པའི་དུམ་བུས་བྱས། །སྤྱི་བོར་ཟླ་བ་ཕྱེད་པས་མཛེས། །མི་མགོ་བརྒྱ་ཕྱེད་ཚུལ་འཆང་ཅན། །སྟག་གི་ལྤགས་པས་ཤམ་ཐབས་བྱས། །དེ་
ཉིད་གསུམ་གྱིས་བྱིན་གྱིས་བརླབས། །སྙིང་ཁར་ཡེ་ཤེས་ས་བོན་བསམ། །དེའི་འོད་ཟེར་གྱིས་བཀུག་ནས། །ཡེ་ཤེས་སེམས་དཔའ་བསྟིམ་པར་བྱ། །དེའི་ཕུང་པོ་ཁམས་ལ་སོགས། །རང་བཞིན་
གྱིས་ནི་དག་པར་འགྱུར། །སླར་ཡང་སངས་རྒྱས་ཀུན་གྱིས་ནི། །དབང་བསྐུར་མཆོད་དང་བསྟོད་པར་བྱས། །བདུད་རྩི་མྱང་པར་བྱས་ནས་ནི། །དོན་དམ་བདེ་བ་རྫོགས་པར་བྱ། །ལུས་ལ་འཁོར་
ལོ་བཞི་དམིགས་ནས། །ལྟེ་བ་སྙིང་མགྲིན་སྤྱི་བོ་རུ། །སྤྲུལ་པ་ཆོས་དང་ལོངས་སྤྱོད་དང་། །བདེ་ཆེན་འཁོར་ལོ་བསམ་པར་བྱ། །འཁོར་ལོ་བཞི་ཡི་དབྱེ་བ་ཡིས། །དགའ་བ་ལ་སོགས་ཤེས་
པར་བྱ། །དང་པོ་སྤྲུལ་པའི་འཁོར་ལོ་ནི། །བསྐྱེད་རིམས་ཡན་ལག་བརྒྱད་ལྡན་ནོ། །འདབ་མ་དྲུག་ཅུ་རྩ་བཞི་ལ། །དེའི་ལྟེ་བར་ཡི་གེ་ཨ། །མཁའ་འགྲོ་མ་ཡི་སྡོམ་པར་བྱས། །གཉིས་པ་པདྨ་འདབ་
བརྒྱད་དེ། །དེའི་ལྟེ་བར་ཡི་གེ་ཧཱུཾ། །འདབ་མ་བཅུ་དྲུག་བསམ་པར་བྱ། །དེའི་ལྟེ་བར་གནས་པར་ནི། །རྣམ་པར་སྣང་མཛད་རང་བཞིན་ཨོཾ། །བཞི་པ་བདེ་ཆེན་འཁོར་ལོ་སྟེ། །འདབ་མ་སུམ་ཅུ་རྩ་གཉིས་
1-4-13b

པ། །དེའི་དབུས་སུ་ཡི་གེ་ཧཾ། །བྱང་ཆུབ་སེམས་ཀྱི་རང་བཞིན་ཅན། །སངས་རྒྱས་ཀུན་གྱིས་སྡོམ་པར་བཤད། །རྫོགས་པའི་རིམ་པ་བསྐྱེད་པ་འདིས། །བསམས་ཏེ་ཐམས་ཅད་བཞིར་ཤེས་བྱ། །
ཕུང་པོ་ཁམས་དང་སྐྱེ་མཆེད་སོགས། །ཡེ་ཤེས་མེ་ཡིས་བསྲེག་པར་བྱ། །སྲོག་དང་བརྩོལ་བའི་སྦྱོར་བ་ཡིས། །ཤེས་རབ་གཏུམ་མོ་སྤར་བར་བྱ། །ལྟེ་བ་ལ་འབར་གཏུམ་མོ་ཡིས། །ཡེ་ཤེས་
ལྔ་ནི་བསྲེག་པར་བྱེད། །སྤྱན་ལ་སོགས་པ་བསྲེགས་ནས་ཀྱང་། །ཧཾ་བསྲེགས་རི་བོང་རྒྱུན་ཡང་འབབ། །རྣ་བ་གཡས་ནས་ཕྱིར་འབྱུང་སྟེ། །སངས་རྒྱས་འཇིག་རྟེན་ཁམས་བཞུགས་པ། །མདུན་
དུ་སོང་སྟེ་སྤྱི་བོར་ཞུགས། །ཡེ་ཤེས་བདུད་རྩི་བླངས་ནས་ཀྱང་། །བདག་གི་སྤྱི་བོར་འབེབས་པར་བསམ། །སྔོན་དུ་བསྲེགས་པའི་སངས་རྒྱས་དང་། །སྤྱན་ལ་སོགས་པ་གསོ་བར་བྱ། །ལྟེ་བར་རང་
བཞིན་མེད་གནས་སུ། །མཉམ་ཉིད་མཉམ་པར་བཞག་པར་བྱ། །སྣང་བ་མེད་དང་བཞི་མེད་པ། །རྡུལ་བྲལ་རྟོག་མེད་བསམ་མི་ཁྱབ། །སེམས་མེད་སེམས་སྟེ་(ཏེ་)སེམས་ཀྱི་ཚུལ། །ཡེ་ཤེས་
ཤེས་བྱའི་རང་བཞིན་ཅན། །རྣལ་འབྱོར་པ་ཡིས་མྱོང་ནས་ཀྱང་། །སླར་ཡང་དེ་ལས་ལྡང་བར་བྱ། །སྒྱུ་མ་ལྟ་བུའི་དངོས་པོ་རྣམས། །ཕུང་པོ་ལ་སོགས་སླར་ཡང་བསྲེགས། །སྐྲའི་རྩེ་མོ་བརྒྱར་
1-4-14a

བཤགས་པའི། །ཚད་མེད་དུ་ནི་བསྒོམ་པར་བྱ། །འགྲོ་བ་དང་ནི་འོང་བ་རྣམས། །བྱས་ནས་ལྟེ་བར་ཐིམ་པར་བསམ། །དང་པོ་དབྱངས་ཡིག་ཞུ་བ་ཡིས། །འོད་གསལ་
ཐིག་ལེ་བསྒོམ་བྱས་ན། །བྱང་ཆུབ་རྡོ་རྗེས་གསུངས་པའོ། །དངོས་གྲུབ་མཚན་མ་སྐྱེ་བར་འགྱུར། །ནང་གི་མཚན་མ་སྐྱེ་བར་འགྱུར། །ནང་གི་མཚན་མ་སྐྱེས་པ་ན། །ཕྱིའི་མཚན་མ་སྐྱེ་བར་འགྱུར། །
མཚན་མ་རྙེད་པས་རྣལ་འབྱོར་པས། །སངས་རྒྱས་བྱང་ཆུབ་ཐོབ་པར་འགྱུར། །རྣམ་པར་དག་པ་ཆོས་ཀྱི་སྐུ། །ཐེ་ཚོམ་མེད་པར་རྟོགས་པར་འགྱུར། །བསྒོམ་པ་ངལ་ལམ་སྐྱེ་ན་ནི། །གསང་
སྔགས་འདི་དག་ཆེད་བརྗོད་བྱ། །ཨོཾ་ཏྲཻ་ལོ་ཀྱ་ཨཱཀྵེ་པ་ཧཱུཾ་ཧཱུཾ་ཕཊ་སྭཱཧཱ། ཨོཾ་བཛྲ་བཻ་རོ་ཙ་ནི་ཡེ་ཧཱུཾ་ཧཱུཾ་ཕཊ་སྭཱཧཱ། ལྷ་དང་ལྷ་མོ་གསང་སྔགས་སོགས། །བཟླས་པ་ལས་ནི་སྐྱོ་གྱུར་ན། །འབྱུང་པོ་
རྣམས་ལ་གཏོར་མ་སྦྱིན། །ཨོཾ་ཨ་ཀ་རོ་མུ་ཁཾ་སརྦ་དྷ་རྨ་ནཾ་ཨརྱ་ནུད་པན་ནད་ཏྭད། ཨོཾ་ཨཱཿཧཱུཾ་ཕཊ་སྭཱཧཱ། ཟ་བའི་ཚེ་ན་རྣལ་འབྱོར་པས། །བདུད་རྩིར་བསམས་ཏེ་བཟའ་བར་བྱ། །རྣལ་འབྱོར་
པ་ནི་ཁྲུས་བྱེད་ཚེ། །སངས་རྒྱས་ཀུན་གྱི་དབང་བསྐུར་བསྒོམ། །གཉིད་ལོག་ཚེ་ན་རྣལ་འབྱོར་པས། །ཐབས་དང་ཤེས་རབ་བདག་ཉིད་བསམ། །འདོད་པའི་ཡོན་ཏན་དག་གིས་ནི། །བདག་དང་
1-4-14b

གཞན་རྣམས་མཆོད་པར་བསམ། །ཇི་ལྟར་བདག་ཉིད་དེ་བཞིན་གཞན། །ཤེས་ནས་འགྲོ་བའི་དོན་ལ་འཇུག །སྤྱོད་ལམ་བཞི་ཀའི་དུས་ཉིད་དུ། །གང་འདོད་ལྷའི་རྣལ་འབྱོར་བསྒོམ། །སྔགས་དང་དབྱིབས་
དང་ཆོས་ཉིད་དག །རྣལ་འབྱོར་རྣམ་པ་གསུམ་དུ་འདུད། །རྣལ་འབྱོར་རྣམ་པ་འདི་གསུམ་གྱིས། །སྲིད་པའི་སྐྱོན་གྱིས་གོས་མི་འགྱུར། །སྤྲོས་མེད་འཁོར་ལོའི་བསྒྲུབ་(སྒྲུབ་)ཐབས་འདི། །བརྩམས་
པའི་དགེ་བ་གང་ཐོབ་པ། །དེ་ཡིས་སེམས་ཅན་མ་ལུས་པ། །སྤྲོས་མེད་གོ་འཕངས་(འཕང་)ཐོབ་པར་ཤོག །སློབ་དཔོན་མཚོ་སྐྱེས་རྡོ་རྗེས་མཛད་པ། རྒྱ་གར་གྱི་མཁན་པོ་ན་རོ་པ་དང་། ལོ་ཙྪ་བ་
མར་སྟོན་ཆོས་ཀྱིས་བསྒྱུར་བ་རྫོགས་སོ། །ཨྠིྀ།། །།


目录
ཡི་དམ་དགྱེས་པ་རྡོ་རྗེའི་ཤོག་རིལ།